Little C住院記

呢篇blog發生係12月中，

 

不過媽媽實在太懶.... 或者太忙，

 

 

終於拖到2015年先寫....

 

 

Happy New Year to ALL!!

 

 

 

講返呢篇Blog，都真係慎入同慎睇~

 

因為我知大家都錫Little C，

 

所以以下既相相信會睇到大家都心痛....

 

 

 

爸爸媽媽都真係心痛，卻愛莫能助....

 

 

 

之前應該都講過下Little C由10月生日後開始返學，

 

就一直開展長達近2個月既眼瘡之旅

 

點解會生眼瘡，實在只能講佢唔好彩~

 

佢唔夠抵抗力~

 

或者講好不幸佢身處唔夠乾淨既環境掛....

 

 

總之係媽媽心目中，係覺得返學帶嚟既影響

 

因為所以客觀環境同條件無改變，

 

唯一改變係帶咗佢返學，而佢亦足足喊足2個月.....

 

 

 

對於返學喊，其實媽媽係無乜心痛，

 

因為2歲唔喊，3歲返學都喊~

 

況且Little C係真係唔係sociable既小朋友，

 

喊係好正常~

 

 

所以由頭喊到尾都真係預咗~

 

只係無諗過可能，當然都唔一定係咁啦，

 

喊而帶起捽眼，再帶起有污糟嘢入眼，

 

最後就係生眼瘡....

 

 

 

起初真係唔係太勁，

 

而爸爸話佢生開眼瘡，又話好易處理，

 

所以媽媽都只係見睇完西醫，醫生都只係話搽眼藥膏，滴眼藥水，食抗生素，

 

呢啲方法唔同work，所以轉咗睇中醫

 

 

中醫睇咗足一個月，但又唔係太見起色，

 

加上bbb媽媽都提過下不如帶去做手術，

 

所以最後問咗好多人，

 

屯門眼科做手術係無麻醉，

 

咁大既Panic我實在擔唔起，唔想Little C係咁既情況做手術，

 

最後又睇返之前既西醫，醫生轉介咗一個眼科醫生比我哋

 

 

但呢個醫生真係無愛心﹗

 

Little C唔肯比佢摸眼檢查，不停喊，

 

就同我哋講咁係無辦法，出去坐下等佢平靜先~

 

 

喂﹗佢唔肯比你掂都好正常，

 

我哋同佢講話我哋有影相代替摸眼得唔得，

 

佢都只係見第二次都唔得先勉為其難咁睇~

 

 

最後都係叫我哋搽眼藥膏，食抗生素等多兩星期睇下細既眼瘡會唔會變大

 

先再決定做唔做手術

 

 

我同老公真係睇完一肚氣，

 

呢個時候唯有向媽媽會問下，

 

好好彩有媽媽原來大既仔仔試過，我哋就上網搵資料就book佢~

 

港安龐朝輝醫生

 

 

龐醫生真係好好，星期五睇佢時，佢已經唔會話要摸，

 

肯睇相之餘仲話用肉眼觀察都見多，即刻約我哋星期日做手術，

 

呢個手術係全身麻醉，但真係比起無麻醉係好好多，起碼唔駛驚佢郁而帶嚟咩影響

 

 

 

 

14/12/2014 下午3點前入院

 

 

我哋約咗6點做手術，入院後Little C心情都未算好醫張，

 

至少姑娘嚟做check up都好合作下

 

而我哋都帶備大量嘢等佢可以打發下時間，

 

因為已經由11.30開始，水都無得飲，

 

驚佢突然發癲要維他奶....

 

事實上佢間中都有扭過，無法子，咁細既小朋友係正常既....

 

 

 

等到近5點鐘，姑娘叫我哋幫佢換手術袍，

 

Little C開始有啲驚，但最令我驚既係駛唔駛打drip？

 

病房姑娘就話應該唔駛，點知去到麻醉等候室時，要打囉....

 

抱住Little C打drip時心都赤，

 

因為自己生佢時打drip都知真係好痛.....

 

 

5.40pm開始做手術時，近6點醫生出嚟話做完，而且總共有11粒咁多，

 

破咗佢紀錄......

 

 

辛苦了Little C

 

 

同醫生傾咗一陣就聽到Little C喊聲搵媽媽，

 

我跟醫生入去睇佢，

 

見到佢雙眼都有紗布封住如下圖，而且當然有血啦~

 

媽媽唔係驚，係見佢好慘咁合埋對眼搵我時，

 

即刻安慰佢都無乜用，

 

因為麻醉醫生話做咗全身麻醉係好似發場惡夢咁，突然驚醒...

 

 

其實之前抱佢入手術室時，我自己都被佢突然無知覺暈咗嚇呆咗

 

因為醫生係落咗藥而我唔知....

 

Little C係我抱住佢時好用嚟錫開夾住腳姆指既夾，

 

呢個應該係用嚟mon住佢生命儀既儀器，

 

再之後佢就min走右眼既紗布，亦有想min走埋左眼，

 

係媽媽我唔比佢咁走，因為驚有傷口又掂到細菌，

 

最後醫生話唔緊要，仲講其實佢想開眼睇嘢時係睇到，

 

不過會有少少嘢張住對眼....

 

 

然後我哋返病房，係再無姑娘聲時，Little C先可以安靜到情緒

 

 

就係咁不知不覺間瞓咗陣

 

 

姑娘講咗可以食嘢飲水，睇下佢有無嘔，

 

而且仲要有小便先走得，

 

我哋係落去做手術前剛好同Little C換咗尿片，

 

所以有哂指標可以睇佢有無小便啦~

 

再夜啲Little C醒咗想飲嘢，終於都可以飲嘢啦~

 

 

 

但Little C成晚飲咗1包細維他奶，再加半包大維他奶都無小便......

 

仲未計佢有飲水.....

 

本來我哋諗住可以即晚走都唔得

 

最後爸爸等到11點都只好自己返屋企

 

媽媽就係醫院同Little C瞓咗一晚

 

呢晚媽媽都真係無乜點瞓，

 

因為Little C間中話隻手好痛，

 

就係打drip既手仔

 

 

 

都話打drip真係好痛

 

雖然其實無針，但到第二朝姑娘拔走我哋先知原來有條膠管仔囉.....

 

 

到15/12/2014，

 

爸爸一早嚟醫院，Little C半夜曾經話要搵爸爸，

 

好好彩媽媽同佢講我哋係屋企瞓緊覺，

 

先無喊住咁過.....

 

 

到咗近10點，Little C終於都肯開眼啦﹗

 

呢個小朋友確實好捱得痛 

 

 

 

食住粒糖都笑得出~

 

 

 

搞掂出院手續，終於都完結啦~

 

返到屋企肯玩肯走

 

 

覆診都已經有2次，醫生話進度唔錯，

 

只係因為無抗生素食，我哋要勤啲幫佢熱敷，

 

同清潔雙手，

 

儘量減低翻發既機會

 

 

 

Little C，辛苦你，呢啲成長戰績係唔易，

 

但深信主必保守﹗Amen!