不可不知的數字...

上一回還在分享K1選校

 

今次要分享的是比選校更需要知道的事~

 

 

話說有次有人問其實會不會真的無書讀？

 

講真，教育局答我們係唔會﹗

 

因為從數字上睇，實際入學同能夠提供學額的總和是有距離

 

換言之仲有位比未有書讀既小朋友

 

 

 

不過問題就嚟啦

 

點解咁多家長咁辛苦由早幾年要半夜排隊拎表

 

到今時今日有人選擇報幾間、有人就如我報成十幾間？

 

兩種現象都係呈現緊大家都緊張學位問題

 

 

 

既然有人問，我呢個總係鍾意搵答案既人就去教育局網頁睇各校既上學年就讀人數

 

發現原來真係會出現一啲上下午班唔同數字，兼K1至K3都唔同數字既學校﹗

 

 

 

係咪好意外呢？

 

 

教育局網址：http://www.chsc.hk/kindergarten/

 

呢個網址好好，有齊好多資料

 

例如校評報告：可以比家長多啲了解學校各層面做成點

 

但要留意教育局係6年一個循環

 

所以有啲報告係2010年前，可以當參考而已

 

理論上學校收到校評報告時，已經會執行相關要改善既建議

 

 

除咗校評之外，仲有學費、學校財務概況、過去學年計，K1至K3收生人數等等

 

 

比起單睇網上的育兒平台

 

其實我比較鍾意睇教育局呢度，因為每間幼稚園都有人支持，有人反對

 

我自己並唔會因為別人點講而點睇

 

諸如多唔多誇境生呢點，其實我都唔在乎~

 

 

事實上，內地上的質素係咪一定差過香港人？

 

我反而睇到係個人修養緊要啲

 

過去係工作層面接觸唔少內地的新來港人士，其實佢哋都唔差

 

分分鐘仲好過唔少自傲的香港人~

 

而且，我重視的是自身經歷多於聽別人點講

 

所以跨境多唔多都唔係重點

 

重點係間學校其實同自己既教育理念、

 

對小朋友既發展有幾大影響同配合先重要~

 

 

講到呢度，我又忍唔住諗三育唔差得過元朗三大......

 

若果唔係因為教義問題，三育中咗已經夠我預定比Little C讀了~~

 

 

 

講返正題先~

 

以下面某幼稚園為例，可以清晰見到上下午師生比例同各級人數

 

 

大家睇到時唔知會唔會同我有同一疑問

 

就係點解上下午人數可以唔一樣？

 

咁係咪收唔夠生呢？

 

 

 

答案係唔係﹗

 

 

 

咁點解呢？

 

話說上星期開會有幸同一位幼稚園校長對話

 

他提醒了我其實教育局係批咗每間幼稚園可收生人數

 

不過學校都會基於唔同考慮點而唔一定收足

 

例如批200，收195人

 

原因並唔係啲咩特別原因，但聽完佢講我又覺得好充份

 

例如學校會考慮高班學生比較大隻啲，班房就唔會用盡quota

 

收少幾個就可以比大啲空間學生

 

 

又例如師生比例可以1：15，但基於想照顧學生多啲，通常都會收少幾個

 

咁又出現收少咗~

 

 

又例如學校係下午時段用咗啲房作為興趣班用途

 

咁房就用咗，好自然地唔能夠收太多生，否則都無房用又點上堂呢？

 

 

 

諸如此類唔同原因

 

 

係呢個時候，請問大家學識點解讀數字未？

 

教育局一定答你仲有學位

 

但問題係學校根本已經收夠，邊度再嚟位呢？

 

 

 

如果大家身邊仲有啲人係懶懶閒

 

真係要提提佢啦~

 

我諗唔會無書讀，但如果講緊同區搵唔到，要跨區讀唔讀？

 

元朗爆咗唔緊要，係南區仲有好多位，咁係咪走去讀？

 

 

唔係想散佈緊張氣氛

 

但係呢個社會，大家真係唔好只聽官講而自己唔了解下

 

係仲有時間做啲嘢時，係咪都做下好過之後後悔？

 

 

 

曾經有媽媽會既媽媽指Little C咁叻咪多學校收

 

老實講，我報22間，in 17間，收6間

 

比例都只係中3成幾

 

學我大學同學所講，扣除人哋比下午班，或一啲唔打算讀既，其實可以揀既最終都係得3間

 

以$40報名費嚟講，我差唔多比咗成千蚊啦~

 

由1/11開始面試到12月中

 

呢啲並唔係叻唔叻問題

 

而係當有選擇時，人哋係咪一定揀你？仲未計其實我哋自己都揀緊人喎~

 

 

所以，有時羨慕既說話係忘卻了別人的付出呢~

 

 

呢個世界有時唔係付出就有收穫，

 

但唔付出就肯定無收穫

 

 

 

各位媽媽共勉~