K1之抉擇

上次媽媽仲諗緊三育定梁李

 

點知第二日就收到另一間

 

元朗三大之一既Offer

 

今次仲要係上午班添.............

 

 

 

其實呢，媽媽並唔係好恨入三大

 

因為名校唔一定係好呢點，係完全套入我身上

 

最主要原因係我會覺得有時名過於實

 

試過元朗三大之一係去年的面試，竟然要家長答學校10個原因點解要揀佢

 

我聽完真係呆咗，亦都有諗過比自己會點答

 

最後實在接受唔到幼稚園面試係著重家長多於睇幼兒能力

 

所以今年無報，即使後來知道原來老公親戚可能可以用人事入

 

我都斷然拒絕

 

 

 

因為心底真係覺得一間好既幼稚園係應該睇幼兒能力

 

而唔係揀家長

 

當然我做過駐校，係好明白家校合作呢點

 

但請恕作為人本工作既我，實在不能苟同幼稚園並唔係以幼兒能力作最基本，

 

兼最大既方向去甄選合適學生

 

 

(其實自己中心都有做功課輔導班，

 

曾經都有老師抱怨點解我哋收親既都係難教

 

講真，如果係易教就唔會走咗嚟社區中心

 

既然我哋目標係低收入人士兼雙職父母

 

點解我哋要揀一啲舒服自己既嚟收？

 

所以到目前為止，我哋都係企硬

 

當然明白做老師有佢難處，但每一間中心都有自己理念的)

 

 

 

而且，係幼稚園面試過程中

 

我係好著重學校點進行面試

 

對於呢點，我們係完全無訓練過Little C

 

亦都係無買過咩玩具嚟訓練佢

 

因為假若係一間人本既幼稚園，其實應該比我更了解唔同月份出身既幼兒

 

係應該出現唔同既能力

 

所以偏收大B，又或著將細B放係下午班等等呢啲唔同既情況

 

我自己亦不敢苟同

 

 

哈，媽媽直認係呢方面係好有性格咁堅持

 

 

所以心目中三大並唔係別人口中既傳統三大

 

 

 

當然，講到尾最後都係自己同屋企人係點睇

 

重視啲咩

 

有幾認識自己子女

 

邊啲幼稚園先係真正岩自己子女既

 

 

好好彩，其實過去我們總共面試咗17間

 

分佈係屯元天

 

事關實在無人可寫包單邊間收

 

所以我只係報我同老公返工沿線既幼稚園

 

亦都無偏執定一定只報基督教幼稚園

 

 

最後好感恩地有6間收咗Little C

 

不過就真係有10間做咗後備

 

1間不取錄

 

而呢6間幼稚園，屯門佔3間，天水圍佔1間，元朗佔2間

 

屯門3間都係無宗教背景，有1間全日，1間上午，1間下午

 

天水圍同元朗全部係基督教

 

天水圍係全日

 

元朗1間上午，1間下午

 

 

 

嚟到呢度

 

媽媽曾經有認真諗過讀屯門梁李秀娛會唔會真係有機會升上屯門一級小學

 

但有媽媽會既媽媽以過來人分享

 

既然龍B係幼稚園都咁激烈

 

小學一定更勁

 

所以佢同我講雖然報返自己母校只得10分

 

但已經係一個唔錯既分，好過無分

 

 

實在講得又好啱

 

所以即使我心儀聖公會蒙恩小學

 

都唯有放棄了

 

 

而且有教會姊妹曾提過我自小接觸的好，會易入腦

 

諗返自己點解中一信主，都係因為幼稚園時已經認為要信主

 

 

所以屯門3間全放棄~

 

 

實在主比我們好大恩典

 

當我好幾晚都諗讀唔讀梁李同最終同自己講要順服時

 

就係23/12/14呢日朝早，元朗三大之一放榜

 

竟然收咗Little C上午班﹗﹗

 

我真係完全無諗過﹗

 

最主要原因係前一晚已經有一個好認識呢間幼稚園校長既媽分享學校只收到9月B

 

所以已經一肚氣，心諗教會學校都咁？點活出信仰呀？

 

 

點知原來間學校係收埋細B..........

 

 

獲知消息一刻係完完全全唔知講咩

 

更加無係媽媽會入面報喜

 

 

 

所以上次仲諗三育定梁李？

 

而家已經唔駛點諗了

 

因為問咗師母呢間三大之一做成點，師母話係好推介

 

(我師母係幼稚園校長)

 

加上又收咗Little C上午班

 

仲好方便99接Little C放學，就算落雨，99都可以全程由屋企行天橋到學校接

 

咁Perfect真係只有主先做到~

 

 

所以呢，我們等埋嚟緊三星期產檢睇下Little S點先

 

如果係28週前有早產機會

 

咁我們就會揀天水圍讀全日

 

(Little S有機會瞓唔知幾耐箱嘛)

 

 

但如果Little S無特別情況發生

 

咁我們繼續憑信心就比Little C讀元朗三大呢間

 

 

雖然到呢刻都仲會覺得呢間學校既唔一定做得好過三育

 

但諗到萬一升小要叩門

 

相信呢間學校既校長威望係會好過三育呢~

 

 

所以，最後係選擇幼稚園，確實真係有好多好多考慮因素~

 

 

下年要報K既blogger，祝大家順利呀 ﹗

 

 

 

 

最後附上退位信

 

為咗加快呢個Music Chair既過程

 

希望好以我有多過一個Offer既媽媽能夠儘快比信，或者打電話比唔諗住讀既學校

 

因為有啲學校係真係已經通知備取生可以補上做正取生啦~

 

當然有啲學校堅持要過埋24/1

 

但呢一步係我哋可以盡力既，就一齊做啦~

 

學校係點唔係我哋可以理，但至少都做自己果份吖嘛~