2015年1月30日 星期五

媽媽之以錢傷人又傷己 (下)

估唔到呢篇Blog一出,大家既回應咁快呀~~
 
係咪好峰迴路轉呢?我都唔識講,大家睇下覺得係咪啦~
 
 
上次講到62話最多唔開車都幫手湊
 
我一聽到老公咁講就已經話我唔要
 
點解呢?因為舊年4月同佢去旅行已經知咩事
 
講返呢次旅行都幾多發現
 
1 我老公終於明白原來佢心目中果種所謂一家人住埋一齊,其實只係理想
 
現實係佢都頂唔順佢老豆
 
哈哈哈….. 有機會我會講返上次旅行啲嘢
 
2 我係行程第二日已經發現我62係接受唔到喊聲
 
比我夜晚問老公時就知道62真係唔得囉
 
我果時問老公:你哋細個喊咁你阿爸會點做?
 
老公:邊個喊就打邊個,唔理邊個係啱
 
我:咁越打係越喊喎
 
老公:係架,所以要搵方法令自己收聲
 
 
大家明唔明點解我企硬唔受62
 
雖然呢個係孫,可能佢會接受到
 
但我62係佢家族中係人都知係錫我老公多啲
 
叔仔佢唔係唔錫,但係有分別
 
所以我印象中好似坐月時,99講過佢都特登錫叔仔多啲
 
希望補返,等兩兄弟都各叫有啲平衡
 
 
我只能講,佢兩兄弟確實好感情,好似無乜影響
 
但完全唔認同呢個方法係方法
 
所以我一早都估緊我62係錫Little C多啲
 
亦正因為咁,加埋旅行既發現,我打死都企硬唔要62幫手湊
 
 
終於係23/1呢日,Little C放學後去到西鐵站同99「交收」時
 
我話我都入閘,要去元朗搞退位啲嘢
 
99一臉狐疑咁問:究竟Little C而家讀半日定全日呢?
 
我呢個絕對唔係廿四孝既媳婦就答:你啲唔鍾意佢讀全日吖嘛,咁咪讀半日囉~
 
再續:其實佢讀全日對你係最好,你可以淨係湊Little S,我媽可以幫手湊Little C放學
 
但你哋唔鍾意都無辦法啦~
 
跟住點講唔記得,家下係記重點﹗
 
我再講:我哋嚟緊會搬近你哋,同埋會請姐姐幫輕你,等你無咁辛苦
 
99:唔得我都會開聲既
 
我:我都知,老公都有講你唔得會開聲,佢會到時返半日幫手湊喎
 
99:吓?咁又唔駛,佢阿爸話可以到時唔開車幫手湊
 
(嘩﹗我仲唔打蛇隨棍上?)
 
我:我就係唔想﹗去一次旅行都知阿爸對喊聲既接受力唔係咁高囉,我做乜係而家有方法去解決時,唔諗定個方法,要去到果時先算?
 
而且請姐姐要成半年,唔係話請就請
 
99:係咩?我問過人話4個月都得既
 
我:通常要半年喎,而且請姐姐係撞手神,而家我有朋友介紹,一定比咩都唔知請有保證啲啦
 
99:隨你哋啦,你哋話事啦~
 
 
有咗呢段對話,至少我都表明立場
 
但勢估唔到,果晚既放工時間,老公打嚟同我講99問佢:
 
Little C係咪讀全日好啲?
 
 
我聽到火都嚟﹗我啱啱係下午先做咗註冊,而家先問?
 
我係咪從來無拋呢個方案先?係你哋唔接受咋嘛
 
我答老公:其實從一個唔駛點用太多錢既情況下,讀全日當然最好啦
 
我哋可以唔駛搬,唔駛請姐姐,你阿媽又只湊一個,每月開支咪多咗Little C2000
 
老公:咁我哋今晚再諗下
 
我:唔諗啦﹗諗咩呀,我註冊咗,仲要我蝕錢?
 
老公:最多我俾
 
我:唔駛,總之唔轉,學券都要成一個月先拎返
 
其實我相信學券唔駛一個月拎返,只係我要斬斷所有既改動
 
我相信99咁問就係因為我同佢傾完,佢先發覺原來我哋要改變咁多
 
搬近佢,又請姐姐,佢應該係果刻先知自己既決定原來影響咁多
 
可能唔好意思下先咁同老公講
 
 
我今次就真係標題咁講:用錢嚟傷自己又傷人﹗
 
而家係用錢嚟買個教訓比99
 
我哋呢啲對話係23號,24號我已經租埋屋添
 
係咪快到爆?
 
唉,其實好鬼用赤,由Little C上月住院到今個月租屋果啲用費
 
已經去咗成10…… 講緊我哋係儲緊首期想買樓
 
10萬又要再努力儲啦…….
 
 
總結:老人家係咪咁我唔知,我只係知道湊大唔湊細真係接受唔到
 
即使而家話肯湊兼認同兩姊妹係唔應該分開湊
 
但潑出去既水真係好難收
 
我諗除咗係禱告裏面求主幫自己寬恕之外,都無乜其他方法了~

2015年1月27日 星期二

媽媽之以錢傷人又傷己 (上)

呢件事真係經典了…..
 
確實有驚嚇,但最終都叫做恩典地渡過….
 
咩事呢?
 
其實早係註冊學校前,已經提過老公要同99講湊兩個同Little C讀邊間係有關聯
 
我心目中係幾想Little C讀全日,所以原先心水頭二大都係全日班
 
只係6299係傳統型既人,佢哋覺得讀全日班既小朋友好慘
 
好慘….. 係因為佢哋覺得讀小學已經全日制
 
幼稚園係黃金三年可以半日,同埋覺得而家啲父母好癲
 
曾幾何時,我99話我係怪獸家長,報22間學校
 
但當佢又聽到身邊啲C9既孫無學校收時,又唔見佢覺得我做足準備功夫….
 
淨係問咁點算?係囉,點算好呢?咪就係等學校比機會囉~
 
 
總之,係1月中我再次同老公講真係要同99
 
我老公仲反問我:乜你覺得阿媽會答你唔得咩?
 
 
事實係……
 
佢竟然答湊大唔湊細﹗
 
 
我係18/1先知呢個最終答案﹗
 
老公仲要好特別地,係我哋帶Little C去剪頭髮時先同我講:
 
阿媽話唔湊細果個,咁你諗住點?你諗住點?
 
果刻我無爆佢我都覺自己EQ算係咁
 
我輕鬆啲咁同佢講:我都係呢刻先知,都未諗,不如你話我知你諗咗起碼一晚覺得點啦。以你性格,你唔會聽完唔諗囉
 
或者老公仲病緊,但就樣衰衰咁同我講未諗掂
 
可能請社區保姆,或者請佢姑媽幫手湊
 
咁即係兩姊妹係分開湊
 
老公話佢有講過我哋既方案:例如讀全日班,但佢話兩老根本聽唔入耳
 
甚至62曾經講,生咗出嚟先算
 
咁點解99湊大唔湊細呢?
 
原因就係佢話驚自己湊唔到Little S
 
但重點係到呢刻,99仲未知Little S有事
 
老公都有問過如果請姐姐,99過嚟幫手睇姐姐得唔得
 
99又話驚自己唔係日日嚟
 
真係任何方案都係無可行方法對應到,總之就係湊Little C only…
 
 
我係18號晚半夜醒咗就有啲失眠,不斷諗應該點做
 
老公甚至問過我點樣可以唔要兩隻狗
 
曾幾何時連人道毀滅都講埋出口
 
果刻我知道唔能夠唔請姐姐
 
所以到咗19號朝早同老公講明唔接受姑媽幫手湊,因為唔係自己孫,
 
萬一知道Little S有事,係可以以承擔唔到責任而開聲幫唔到
 
咁到時就又企係度
 
 
不過最終EQ都係失控
 
係中心忍唔住喊,老細見到都特登同我傾
 
實在好難接受兩姊妹要分開湊
 
亦同老公講既然開得呢個盤,真係唔駛預我以後會出席必出席以外既飯局
 
老公係咁話自己表達唔好,其實大家原意都係想兩姊妹有好既照顧
 
唉,呢個理由係真係點都接受唔到其實係為咗兩姊妹好囉….
 
 
最後到咗20號早上,老公講返19號放工後同6299傾完既結果
 
就係知道咗Little S有事,99肯湊,不過都講咗如果頂唔到就會開聲
 
62就話到時最多唔開車幫手湊
 
 
去到呢度,都叫有啲下文
 
時間關係,下半集再記低先~