小小心底話

呢件事除了戰友們，教會部份比較熟既弟兄姊妹

 

今日係呢個平台講下

 

因為我發現自己要搵一個地方去記低呢一點一滴~

 

 

 

其實一直都好想快啲有第二胎

 

而Little S既到來都係期待中，但又超過想像既時候嚟到

 

 

不經不覺由7月尾中咗

 

走到今天已經20週了

 

就在星期一做結構檢查時

 

細心既醫生發現Little S係右耳對上，高過額頭位置有一個大約2cm既腫瘤

 

而Little S既頭仔都只不過係4cm大， 可以想像到呢個腫瘤真係唔係細

 

醫生即場同我哋再望多次唔同既位置

 

最後講好大機會係血管瘤，因為個腫瘤入面有唔少血液流動

 

同時醫生寫轉介信比我返屯門醫院睇

 

 

呢刻老公真係愁哂，因為星期日晚仲問我擔心嗎

 

我答佢唔擔心，因為生命係神掌管

 

想不到事情真的發生，而我都好平靜，亦深信主必帶領

 

 

到了昨天，屯門醫院登記後，下午兩點幾打嚟搵我4點半前見

 

果然公立醫院跟得好快﹗

 

老公收到消息即刻趕返嚟，而我哋有3位醫生同我哋做結構檢查，

 

由5點多做到成6點半

 

都終於見識到公立醫院其實會做結構.... =p

 

 

醫生們的講解其實都差不多，但講多咗長此下去對我會出現咩影響

 

而我都聽到醫生間對話有提及仲有幾星期可以觀察住

 

換言之，即係法例規定24週以內係可以合法墮胎一事

 

 

醫生提到Little S目前並沒有心衰竭，因為心臟既要泵血支持自己身體之餘

 

仲要泵血供應2cm大既瘤

 

如果係按比例咁大落去，或者大得快過Little S

 

出現心衰竭既機會會好大

 

跟住就有機會水腫

 

而我就會胎水過多

 

到我有機會妊娠毒血症

 

 

 

講到呢度，其實我情緒都好ok，無喊無唔捨得

 

擺你命3000既情況出現係夜晚搵阿姨講呢件事

 

因為我同老公共識咗唔同4大長者講，一心諗住阿姨可以早啲知幫下口

 

點知阿姨一聽就建議我墮胎

 

點解呢？原來我大姨媽係一直有血管瘤而不自知，到發現時已經雞蛋咁大

 

亦做唔到手術，最後一次突然中風就過身了

 

加上阿姨話佢見身邊朋友的仔女有事手尾好長

 

所以就有呢個建議

 

 

我理解佢點解咁做，但我同時預見到自己屋企人都會有咁既睇法

 

開始感到嚟緊日子應該唔好過......

 

 

 

到今天，間中收到弟兄姊妹既支持訊息就會忍唔住喊

 

打呢篇文章我都無喊，就係一有人支持自己同Little S就會喊

 

 

 

家牧問我覺唔覺神興起環境要我返去禱告

 

我知的，我好覺得呢次Little S係一個小天使，將我們一家緊緊再一次帶進神的愛中

 

至少昨晚是我們三人一起為Little S按手禱告

 

對，連Little C都有份呢~

 

 

所以我從心底都相信在神裏面，只有祝福沒有咒詛

 

 

Little S，求主祝福你是一個充滿生命力的小生命

 

並奉主名宣告頭上腫瘤不會再長大﹗Amen~