眨下眼
Little C已經歲半啦﹗
媽媽真係太懶太懶
加上工作真係忙咗
寫Blog既動力又懶咗
所以今次趁仲未超過一星期
(其實差一日咋)
先嚟個小總結先：
食：2飯1茶點1奶 / 2飯2奶
奶已經由最高峰8安減到6安
而媽媽奶呢，Little C仍然超鍾意﹗
所以我都唔知幾時幫佢戒好
至於飯仔方面
媽媽實在無bbb媽媽同波媽、豬脾媽咁好心思
依舊係雪冰粒加熱就搞掂
所以飯仔都仍然係好天然既.... 草香咁
哈哈哈
不過其實佢已經食咗好多好多唔同既雜食
例如腸仔、魚旦、腸粉、燒賣...... 無數既茶樓可以食到既
相信佢都食過
近呢幾日，Little C愛上有機生果乾
最鍾意係蜜桃
幾日就食哂一包
喜愛程度係沖涼時會為咗有得食拿拿臨起身抹身
至於飲品方面
媽媽仲未俾佢飲其他飲品
所有盒裝都未俾過
只係俾過豆漿
而鮮奶就唔會俾
因為奶其實入面有脫鈣既成份
所以媽媽唔打算咁早就俾
可能到幼稚園時開始俾佢飲下
旨在等佢唔駛因為無接觸而敏感
大小肌發展
媽媽係Little C一歲時開始帶佢出去上幾出名既幼潛
當時心態係睇下有幾巴閉only
(因為多人到要抽簽先搞掂)
但上完一期後，實在不得不佩服
如是者今日已經係第三期啦
係幼潛呢度
Little C既大小肌都有幾唔錯既發展
最記得係第一期課堂時
Little C係好唔鍾意爬隧道
每次要爬時就喊
起初媽媽都奉行係星期日既另一個PG所學既
讓孩子自然接觸
但係幼潛唔係咁樣，反而鼓勵俾小朋友慢慢嘗試
於是成就咗喊住爬呢下啦
就係咁，總共玩咗四次，第一次喊無乜玩
第二次硬嚟，喊
第三次又硬嚟，喊
係第二同第三次時，導師會講出Little C有咩唔同咗
令我真係好欣賞導師﹗
到今天課堂，Little C係急不及待咁走去爬隧道
甚至上星期日中心開PG試試堂時
佢係走去拍人pat pat叫人爬隧道
而且今日Little C係媽媽鼓勵同幫助下
終於成功挑戰到踩唔同質感既地氈
Yeah~
而小肌都應該係Ok
會轉手放錢落樽、
砌積木、
摘士多啤梨、
執唔同大小既珠仔入益力多樽等等
總括嚟講都好好
語言
人物：爸爸、媽媽、爺爺、麻麻、哥哥、姐姐
動物：Co Co、豆豆
物件：波波、車車
感受或回應字眼：好味、謝謝、晨晨、Bye Bye、唔好、好、得、正
應該係咁多
同埋今日學吹BB，應該過多排佢會識講更多嘢
社交
呢排Little C做咗大家姐
例如：收樂器時走去幫小朋友拎埋交出去
拍人pat pat同趕人爬隧道
媽媽我唔知佢幾時學返嚟
@@
同埋都去到會同人搶嘢玩
有自己地盤意識
媽媽我既睇法係
必須經歷﹗
所以都係慢慢教啦~
講咗咁多回顧
媽媽其實最想同大家分享呢輯歲半家庭照
只係收到好幾張
但媽媽真係好鍾意呀﹗
識行識走，都係影戶外最好﹗
大家不妨安排下啦~
雖然今次影相同老公嘈過
(佢自己唔記得係度賴我)
但媽媽仍然會為兩歲影輯相
哈哈哈哈
可能到時飛起老公，嚟個母女家庭照
再收到時同大家又分享下先~
